WAHANGA WA ATHARI ZA WANYAMA WAKALI SAME WALIPWA MIL.217

Posted on: May 9th, 2024

Wizara ya Maliasili na Utalii umetoa kifuta jasho cha Shilingi milioni 217 kwa wahenga wa madhara yatokanayo na wanyama waharibifu kwenye Wilaya ya Same,mkoani Kilimanjaro.

Akizungumzia kifuta jasho hichoMkurugenzi Mtendaji wa Halmashauri ya Wilaya ya Same,Bw.Jimson Mhagama alisema kifuta jasho hicho kimetolewa kwa wahanga 1,515.

"Tunashukuru sana Wizara ya Maliasili na Utalii kwa kulipa kifuta jasho kwa wahanga katika Wilaya yetu kwani imesaidia kupunguza malalamiko"alisema Bw.Mhagama.

Kwa upande wake Afisa Wanyamapori Wilaya ya Same, Bw. Thomas Katunzi alisema kifuta jasho kimetolewa kwa familia za watu 06 waliopoteza maisha baada ya kuuliwa na wanyama.

Alisema wahanga wengine waliolipwa ni wahanga wawili waliopata majeruhi baada ya kuathiriwa na wanyama.

"Wengine waliolipwa ni wafugaji ambao mifugo yao 13 iliuawa na wanyama wakali ambapo pia wakulima walilipwa fidia kutokana na mazao yao ekari 2,396"alifafanua Bw.Katunzi