RC AAGIZA POLISI KUWASAKA WANAOHARIBU MIUNDOMBINU HIFADHI YA SHENGENA

Posted on: October 3rd, 2024

Mkuu wa Mkoa wa Kilimanjaro Mheshimiwa Nurdin Babu ameliagiza jeshi la polisi Wilaya ya Same kuhakikisha wanawasaka na kuwakamata watu wanaoharibu samani kwenye eneo la kumpumzikia watu wanaopanda Mlima Shengena.

Mheshimiwa Babu ametoa agizo hilo wakati alipofanya ziara kwenye eneo Hilo ambapo alishuhudia uharibifu mkubwa ukiwa umefanyika eneo hilo.

"Serikali inatumia pesa nyingi kutengeneza hivi vitu ili watalii wanaopanda Mlima Shengena wapate sehemu ya kupumzikia wanaposhuka lakini wahuni wachache wanaviharibu,hii haivumiliki,jeshi la polisi hakikisheni wahusika wanakamatwa"alisema Mkuu wa Mkoa

Awali akitoa taarifa ya tukio hilo Mhifadhi wa Msitu wa Asili Chome (Shengena) Bw.Yusuf Kajia alisema tukio hilo la kuvunja viti cha kupumzikia imetokea Kwa mara ya pili.

Mwaka jana walivunja pia na mwaka huu wamekuja tena wamevunja,hali hii inatupa wakati mgumu sana maana gharama ya ukarabati ni kubwa.

Mkuu wa mkoa wa Kilimanjaro amefanya ziara ya siku moja Wilayani Same ambapo alitembelea Miradi ya TASAF  na Miradi inayofadhiliwa na Mfuko wa Milima ya Tao la Mashariki ambapo hifadhi ya Chome imetekeleza Mradi wa upandaji miti.