MAAFISA MAENDELEO KATA WAPEWA ELIMU KUTUMIA WEZESHA PORTAL

Posted on: October 4th, 2024

Kufuatia kufunguliwa kwa dirisha la mikopo ya vikundi vya wanawake, vijana na watu wenye ulemavu Wilaya ya Same imetoa mafunzo kwa maafisa Maendeleo ya Jamii  zaidi ya 30 ngazi ya Kata juu ya utaratibu wa kuwasilisha maombi kupitia mfumo wa Wezesha Portal.

Akitoa mafunzo kwa maafisa hao Afisa Maendeleo Wilaya ya Same Bw. Charles Anatoly alisema kwasasa mfumo wa unaotumika kupokea maombi ni mfumo ulioboreshwa ambao unawezesha mchakato wa upatikanaji wa mkopo kwa haraka.

Alisema Mfumo huo ujulikanao kama Wezesha Portal umeshafanyiwa majaribio na umeonesha mafanikio hivyo maafisa Maendeleo Kata wamepewa elimu ili waweze kuwasaidia wanavikundi kuomba mkopo kwenye mfumo.

”Serikali imeboresha mfumo wa uombaji wa mikopo ili kuviwezesha Vikundi kuomba mikopo kwa urahisi na kuharakisha mchakato wa wao kupata mikopo”alisema Bw.Anatoly

Maombi ya mikopo ya Vikundi vya Wanawake, Vijana na watu wenye ulemavu yameanza kupokelewa kupitia mikopohalmashauri.tamisemi.go.tz na mwisho wa kupokea maombi ni Oktoba 10,2024.

Halamshauri ya Wilaya ya Same ina vikundi zaidi ya 100 vya wanawake, vijana na watu wenye ulemavu ambavyo vimesajiliwa na vina sifa ya kuomba mikopo hiyo.

“Mikopo ya awamu hii itatolewa kwa vikundi ambavyo havidaiwi na halmashauri,kama kikundi kinajua kina deni la nyuma kilipe kwanza deni ndio kiombe mkopo mwingine”alisema Bw. Anatoly