MILIONI 92 ZAMWAGWA

Posted on: November 18th, 2020

Halmashauri ya Wilaya ya Same imetoa mkopo wenye thamani ya shilingi milioni 92,000,000/= kwa vikundi  vya wanawake,vijana na watu wenye ulemavu,ambapo wanawake wamepata shilingi milioni 36,800,000.00 ,vijana shilingi milioni 36,800,000.00 na watu wenye ulemavu shilingi milioni 18,400,000.00.Mikopo hii ni kutokana na makusanyo ya mapato ya ndani na  marejesho ya mikopo ya nyuma  kwa kipindi cha robo ya nne 2019/2020 ambapo inakwenda kuwa chachu ya maendeleo ya vikundi,mtu mmoja mmoja na Wilaya kwa ujumla.

Akikabidhi hundi za mikopo hiyo Mkuu wa Wilaya ya Same Mhe.Rosemary Stack Senyamule ambaye alikuwa ni mgeni rasmi ameipongeza Halmashauri kwa kutoa mikopo hiyo ambapo ni kutekeleza ilani ya Chama Cha Mapinduzi(CCM) vilevile amewapongeza kina mama na vijana kwa kupata fursa hiyo ya kupata mkopo ambapo alisema ni agizo la Mhe.John Magufuli kwamba kina mama na vijana wapewe mikopo isiyo na riba kutoka katika mapato ya ndani ya Halmashauri na kuviasa vikundi hivyo kutumia mikopo hiyo kwa malengo yaliyokusudiwa ili kujikwamua kiuchumi.

Aidha  Mkurugenzi Mtendaji wa Halmashauri ya Wilaya ya Same Bi.Anastazia Tutuba amewahakikishia wana Same kwamba Halmashauri itaendelea kutoa mikopo kwa vikundi vya kina mama,vijana na walemavu na kuwataka walengwa hao waunge mkono juhudi hizo kwa kufanya kazi kwa bidii,kulinda mapato ya Halmashauri yasipotee na kurejesha kwa wakati ili zoezi liwe endelevu.

Zoezi hilo pia lilihudhuriwa na wadau mbalimbali kama CRDB na vyama vya ushirika Same Kaya SACCOS.