Posted on: January 28th, 2025
Katibu Tawala wa Mkoa (RAS) wa Kilimanjaro Bw.Kiseo Nzowa amewataka wasimamizi wasaidizi wa kisheria kutekeleza majukumu yao kwa weledi wakati wa Kampeni ya Mama Samia Legal Aid yenye lengo la kutoa msaada wa kisheria kwa wananchi.
Ametoa wito huo wakati akifungua mafunzo kwa timu za wasaidizi wa kisheria toka Halmashauri Saba za Mkoa wa Kilimanjaro.
"Lengo la Mama Samia Legal Aid ni kutoa Elimu ya Sheria na Msaada wa kisheria bure kwa wananchi wanaokabiliwa na changamoto mbalimbali za kisheria"alisema.
RAS Nzowa alisema kuna changamoto nyingi za kisheria kwenye maeneo ya Vijiji lakini wananchi hawajui watapata wapi msaada.
Alisema Mama Samia Legal Aid ni msaada mkubwa kwa wananchi wa Vijijini kuweza kuwatatulia changamoto za kisheria.
Nae Msajili wa watoa huduma za msaada wa kisheria kutoka Wizara ya Katiba na Sheria Bi.Ester Msagazi amesema Mama Samia Legal Aid inatekelezwa Tanzania Bara na Zanzibar.
"Lengo ni kuhakikisha kuwa wananchi wa pembezoni wanapata msaada wa kisheria,na tayari tumeshafikia mikoa 16 na Kilimanjaro ni wa 17" alisema.
Kaulimbiu ya Kampeni hizi inasema "Msaada wa kisheria kwa haki,usawa,Amani na Maendeleo"
Mama Samia Legal Aid inaratibiwa na kusimamia na Wizara ya Katiba na Sheria.
