Posted on: September 18th, 2024
Mkuu wa Wilaya ya Same Mheshimiwa Kasilda Mgeni, amewaasa vijana wa Umoja wa Vijana wa Chama cha Mapinduzi (UVCCM) kuendelea kukilinda Chama ili kiendelee kubaki kwenye hadhi na misingi yake imara ambayo imewekwa na waasisi tangu kuanzishwa kwake.
DC Kasilda amezungumza hayo akiwa Kata ya Mabilioni wakati alivyotembelea kambi ya mafunzo kwa vijana wa UVCCM ambapo amesisitiza vijana kuendelea kukitumikia Chama kwa moyo mmoja ili kuhakikisha kinaendelea kuwa imara zaidi.
“Vijana endeleeni kuwa na mshikamano baina yenu, muwe na umoja kwani umoja wenu ndiyo utafanya Chama chetu kiendelee kuwa imara zaidi na kiendelee kuaminika Kitaifa na Kimataifa” Alisema Mhe.Kasilda.
Mwenyekiti wa Vijana UVCCM wilaya hlya Same Comrade Azza Karisha amesema kuwa katika muda wote wa kambi vijana wamepata mafunzo kutoka kwa wakufunzi mbalimbali, mafunzo ambayo yataenda kuwa na matokeo chanya kwenye Chama hasa kwenye kipindi hiki cha Uchaguzi wa Serikali za Mitaa.
Vijana zaidi ya 200 kutoka Kata mbalimbali za Wilaya ya Same wamejitokeza kushiriki mafunzo hayo ambayo yameendeshwa kwa muda wa siku tano kuanzia September 12 hadi 16 mwaka huu 2024.
Chama cha Mapinduzi kumekuwa na utaratibu wa kutoa mafunzo na maelekezo kwa vijana wake kupitia kuwaweka katika makambi mbalimbali.
